Anders Beer Wilse 1865-1949

Anders Beer Wilse (1865-1949), som arbeidde i fyrste halvdel av 1900-talet, var den førande fotografen i Noreg i si samtid, og ein av dei mest markante norske fotografane nokon sinne. Den enorme biletsamlinga etter Wilse, meir enn 200.000 foto, er den mest nytta i landet. Hordamuseet kan no syne fram 29 av Wilse sine klassikarar, ei utstilling som er produsert av Skimuseet i Holmenkollen.

Friluftsfotografen Wilse fanga den norske folkesjela gjennom eit halvt hundreår. Han var med på å skape myten om folket som er født med ski på beina, og som nyttar fritida til å lange ut i skog og mark og på fjellet. Wilse reiste Noreg på kryss og tvers for å ta bilete av nordmenn i fri utfolding i vakker norsk natur, særleg i vinterlandskap. Han var ikkje oppteken av det storslagne, men av det nære, sjølve gleda ved å oppsøkje naturen. Mange av hans bilete var mynta på turistar og reiselivsnæringa, som reklame for å trekkje turistar til den unge nasjonen Noreg. Bileta til Wilse har vore viktige i oppbygginga av vårt nasjonale sjølvbilete og det biletet utlandet har av oss i fjord- og fjellriket her nord i Europa.

Mange av friluftsbileta ligg portrettfotoet nært. Wilse tok òg portrett av kjendisane i samtida. Utstillinga syner mellom anna uttrykksfulle portrett av nasjonalheltane Amundsen og Nansen, dei litterære kjempene Ibsen, Bjørnson, Hamsun og Undset, komponisten Grieg og målaren Thaulow.